Акафист Свт. Спиридону Тримифунтскому
Акафист Богородице "Скоропослушница"
Акафист священномученику Харлампию
Акафиста святому архиепископу Луке Крымскому
Акафист Свт. Спиридону Тримифунтскому
Кондак 1
Препрославленный от Господа святителю и чудотворче Спиридоне! Ныне всечестную память твою празднующе, яко много могущему споспешествовати нам о прославльшем тя Христе, умильно вопием ти: избави нас от всяких бед и зол, да с благодарением зовем ти:
Радуйся, Спиридоне, предивный чудотворче!
Икос 1
От юности украшенный всеми добродетельми, житием своим Ангелом подражавый, ты, святителю Спиридоне, воистину показался еси друг Христов; мы же зряще тя, небеснаго человека и земнаго ангела, со благоговением умильно вопием ти:
Радуйся, уме, созерцаяй тайны Пресвятыя Троицы;
радуйся, обогативыйся Духа пресветлым осиянием.
Радуйся, светильниче многосветлый;
радуйся, ум твой безстрастием просветивый.
Радуйся, измлада истинную простоту и безмолвие возлюбивый;
радуйся, украшение целомудрия.
Радуйся, любве неистощимая струя;
радуйся, яко страннолюбию Авраама подражал еси.
Радуйся, яко всем любвеобильно входы дома своего отверзал еси;
радуйся, нищих предстателю.
Радуйся, пред нимже благоговеют людие;
радуйся, яко ты еси обиталище Пресвятаго Духа.
Радуйся, Спиридоне, предивный чудотворче!
Кондак 2
Видяще остров Кипр и вся христианския страны нетленныя мощи твоя, святителю, от нихже истекают обильная исцеления, ворадовашася; и мы, почитающе тя яко преобильнаго источника благодати, низпосланнаго свыше нам, вопием к Верховному Подателю Небесных и земных благ: Аллилуия.
Икос 2
Разум Божественный имый, аще сый пастырь безсловесных овец, ты произволением Пастыреначальника Христа избран был еси в пастыря овец словесных. Вернии же, разумевше тя добраго пастыря, неусыпно о стаде своем пекущагося, воспеваху:
Радуйся, архиерее Бога Вышняго, в хиротонии восприявый обильно Божественную благодать;
радуйся, светильниче многосветлый, горяй и светяй.
Радуйся, верный делателю в вертограде Христовом;
радуйся, пастырю, на пажити веры и благочестия паству свою воспитавый.
Радуйся. сияньми добродетелей твоих мир просвещавый;
радуйся, Престолу Христову Божественную Жертву приносивый.
Радуйся, иерарше, разумением Православия украшенный;
радуйся, апостольскаго учения исполненный, верных струями спасительнаго учения напаяяй.
Радуйся, яко и мудрых озарил еси;
радуйся, яко и простых сердца обновил еси.
Радуйся, славо православных и Церкве непоколебимое утверждение;
радуйся, украшение отцев, славо и похвала иереев благоговейных.
Радуйся, Спиридоне, предивный чудотворче.
Кондак 3
Силою Вышняго, осенившею тя, святителю Спиридоне, богомудр ты показался еси и, сжавши дланию глину, троичность Лиц всем очевидно уяснил еси: темже лжемудрии философи, собравшиися на Соборе, ужасошася, вернии же непостижимаго прославиша Бога, умудрившаго тя во спасение, вопиюще Ему: Аллилуия.
Икос 3
Имеюще тя в помышлениих своих вси отцы Собора проста, неискусна в книжнем учении, молиша тя, отче Спиридоне, не препиратися словесы с витиею, мнящимся мудр быти. Ты же, святителю, ревностию по Бозе распаляемый, веруя, яко проповедь Христова не в препретельных мудрости человеческая словесех, но в явлении духа и силы, премудре того обличив, вразумил и на путь истинный наставил еси. Вси, видевше чудо сие, взываху:
Радуйся, свете православныя мудрости;
радуйся, яко глаголемых быти мудрых совопросников посрамил еси.
Радуйся, источниче, благодатию обильный;
радуйся, непоколебимый столпе, твердо содержащий сущих в вере.
Радуйся, омрачаяй всепагубную ересь;
радуйся, чрез негоже попрано бысть безумие.
Радуйся, яко персть земная проповеда твоима рукама Святую Троицу;
радуйся, яко из глины извел еси огнь и воду во утверждение догмата Святыя Троицы.
Радуйся, яко просветил еси люди славити Слово, воистину Единосущное Пребезначальному Отцу;
радуйся, яко змиеву главу пагубныя Ариевы ереси поразил еси.
Радуйся, яко тобою пожерта бысть злоба;
радуйся, невернаго мудреца совопросника к истинней вере обративый.
Радуйся, Спиридоне, предивный чудотворче!
Кондак 4
Жизнь проводя в убожестве и нищете, нищим и бедным был еси питатель и помощник и, любве ради к нищим, змия в злато преложил еси и дал еси оное требующему твоея помощи. Дивящеся о чудеси сем, благодарственно вопием к Богу: Аллилуия.
Икос 4
Слышано бысть всем и всюду, яко святитель Спиридон воистину есть жилище Святыя Троицы: вселися бо в нем Бог Отец, Бог Слово и Бог Дух Святый. Сего ради ты словесы и деяньми проповедал еси всем христианом воплощеннаго истиннаго Бога, вопиющим:
Радуйся, словес Божиих таинниче;
радуйся, Домостроительство Божие о спасении мира уяснивый.
Радуйся, яко научил еси не испытовати еже есть превыше разума и мудрости человеческия;
радуйся, непостижимую действующую в тебе силу Божию явивый.
Радуйся, яко устами твоими провеща Сам Бог;
радуйся, яко вси послушаху тебе в сладость.
Радуйся, мглу идолослужения разгнавый;
радуйся, яко многих к истиней вере привел еси.
Радуйся, яко главы невидимых змиев поразил еси;
радуйся, яко тобою прославляется вера христианская.
Радуйся, яко светло озаряеши всех ублажающих тя;
радуйся, поборниче христианския веры и Православия.
Радуйся, Спиридоне, предивный чудотворче!
Кондак 5
Божественнаго Духа преисполнен был еси, святителю Спиридоне, ради добродетельнаго жития твоего; зане кроток, милостив, чист сердцем, терпелив, непамятозлобив, страннолюбец был еси: сего ради Творец и в чудесех преславна показа тя. Мы же, прославляя Бога, прославльшаго тя, вопием Ему: Аллилуия.
Икос 5
Равноангельна Спиридона зрим, великаго чудотворца. Некогда страна от бездожия и засухи вельми пострада: бысть глад и язва, и многое множество людей умроша, молитвами же святителя сниде с небесе на землю дождь; людие же, избавльшеся от бедствия, благодарственно взываху:
Радуйся, великому пророку Илии уподобивыйся;
радуйся, яко дождь, отъемлющий глад и недуги, благовременне низвел еси.
Радуйся, паки молитвами своими небо заключивый;
радуйся, яко немилосердаго купца лишением имения наказал еси.
Радуйся, яко требующим пищу обильно даровал еси;
радуйся, яко любоблагоутробие Бога к людем подвизаеши.
Радуйся, вземляй немощи немощных;
радуйся, богоблагодатный человеком помощниче.
Радуйся, болящим здравие подаваяй;
радуйся, егоже трепещут демони.
Радуйся, безчисленных чудес источниче.
Радуйся, Спиридоне, предивный чудотворче!
Кондак 6
Завеса ветхозаветной скинии закрываше во Святая Святых ковчег, манну и скрижали. И храм твой, святителю Спиридоне, имеет раку твою, яко ковчег, святыя мощи твоя, яко манну, сердце твое, яко скрижали Божественныя благодати, на нихже зрим начертанную песнь: Аллилуиа.
Икос 6
Народ Кипра некогда за умножение беззаконий наказа Господь безплодием земли, егда же прииде к святому Спиридону знаемый земледелец, прося помощи, даде ему святый злато; минувшу же бедствию, земледелец оный возврати паки злато, и — о чудесе — злато змий бысть. Прославляюще Бога, дивнаго во святых Своих, вопием:
Радуйся, яко Моисею, чудесно преложившему жезл в змия, подражал еси;
радуйся, человеколюбивый пастырю, избавляяй от бед словесныя овцы стада своего.
Радуйся, обильно всех всеми благами обогащаяй;
радуйся, яко Илиа, бедных питавый.
Радуйся, немилосердых к милосердию обращаяй;
радуйся, достоподражаемый пример любве для человеков, в мире живущих.
Радуйся, верных и неверных в бедах утешение;
радуйся, древо сеннолиственное, град и страну осеняющее.
Радуйся, славо и похвало керкирян;
радуйся, над влагою и сушею, зноем и хладом благодатию Божиею владычествуяй.
Радуйся, уставы земли молитвою пременяяй;
радуйся, будущая, яко настоящая, провидевый.
Радуйся, Спиридоне, предивный чудотворче!
Кондак 7
Ходатай пред Господем за всех явился еси, святителю Спиридоне: сего ради и мы прибегаем под кров твой, ищуще спасения, вси бо помощника тебе имамы во всех нуждах, во время глада, смертоносныя язвы и во вся годины бед и искушений. Сего ради благодарственно вопием Богу: Аллилуия.
Икос 7
Новое чудо видим боголепное: егда ты, отче, шествовал избавити неповинно осужденнаго на смерть, бурный поток прегради путь тебе; ты же именем Всемогущаго Бога повелел ему стати и прешел еси со спутники чрез реку, яко по суху. Слава о сем чудеси распространися всюду, и вси прославиша Бога, вопиюще к тебе:
Радуйся, яко иногда Иисус Навин чрез Иордан реку по суху прешедый;
радуйся, речная устремления гласом своим укротивый.
Радуйся, яко трудный путь предпринял еси, движимый милосердием;
радуйся, яко клевету разрушил еси и неповиннаго от уз темницы и напрасныя смерти избавил еси.
Радуйся, жизни по Бозе благий поспешниче;
радуйся, неповинно угнетенных защитителю.
Радуйся, уставов естества воднаго пременителю;
радуйся, яко судию вразумил еси и от убийства спасл еси.
Радуйся, истинное исправление душ;
радуйся, дивное сило, потоки удержавающая.
Радуйся, услаждающий сердца человеков, к тебе притекающих;
радуйся, человеколюбию Авраама подражателю.
Радуйся, Спиридоне, предивный чудотворче.
Кондак 8
Странник и пришлец был еси на земли, якоже и прочии человецы. Обаче из чрева матере Всеведущий великаго угодника и чудотворца показа тя, святителю Спиридоне: бесы бо изгоняеши, всякую болезнь и язву исцеляеши, помышления людей зриши, темже и дивен во святых показался еси. Мы же, возсылающе молитву ко Благодателю всех Богу, вопием Ему: Аллилуиа.
Икос 8
Весь мир ужасом многим содрогнуся, егда услыша, яко смерть, по гласу твоему, возвращает из гробов мертвецы своя, и возопи:
Радуйся, умершую дщерь свою, да явит врученное ей сокровище, к жизни воззвавый;
радуйся, скорбную вдовицу, на сохранение злато вдавшую, утешивый.
Радуйся, умершее отроча из мертвых воскресивый;
радуйся, яко матерь его, внезапно от радости умершую, ожививый.
Радуйся, яко уподобился еси Илии, молитвами сыну Сарептския жены жизнь вовратившему;
радуйся, яко и Елисею, возбудившему от смерти отроча, подражал еси.
Радуйся, пастырю, преискренне любящий человеки;
радуйся, жене блуднице, слезами нозе твои омывшей, грехи именем Бога отпустивый.
Радуйся, святую ревность верховнаго апостола стяжавый;
радуйся, яко нераскаянная грешница, по глаголу твоему, в тяжких болезнех умре.
Радуйся, земли плодоносие молитвами твоими испросивый;
радуйся, непреложное воскресения человеков уверение.
Радуйся, Спиридоне, предивный чудотворче.
Кондак 9
Духа Божественнаго осияньми озарен был еси, святителю Спиридоне, имел бо еси духа премудрости, яко мудрыми словесы безумных обуил еси и посреде отцев веру утвердил еси, духа разума, яко умы омраченыя озарил еси; духа страха Божия, яко выну делании богоугодными душу очистил еси. Темже, представ Престолу Вышняго, с сонмом Ангелов воспеваеши Ему: Аллилуиа.
Икос 9
Жезл пастыря словесных овец от Пастыреначальника Господа Иисуса приемый, святый Спиридон не премени жития своего: нестяжателен, кроток, любве ради вся терпяй, не постыдеся пещися и о стаде безсловесных овец. Вся сия возбуждают нас славити Бога и взывати тебе:
Радуйся, славу мира сего яко суетную презревый;
радуйся, мзду многу на Небесех стяжавый.
Радуйся, красная мира сего в уметы вменивый;
радуйся, сосуде Небесных благ.
Радуйся, святейшая пажите киприотов;
радуйся, яко тебе ради Бог хищников овец твоих невидимыми узами связа.
Радуйся, татем отеческое вразумление преподавый;
радуйся, по милосердию твоему за проведенную без сна нощь овна им даровавый.
Радуйся, непослушанием козлища, яко бы разум имущаго, купца, утаившаго цену его, обличивый;
радуйся, утаившаго сребренники твоя к покаянию приведый.
Радуйся, яко страсти корыстолюбия увещанием своим исцелил еси его.
Радуйся, Спиридоне, предивный чудотворче.
Кондак 10
Спасаяй души паствы, Богом тебе вверенныя, ты, святителю Спиридоне, произволением Божиим, зван был еси явити славу твою, паче же славу Истиннаго Бога, и в иныя страны, да всюду славят имя Божие, вопиюще: Аллилуиа.
Икос 10
Скорый помощник и заступник во всяких нуждах и скорбех, святый Спиридон, по повелению цареву, якоже и прочии пастыри, прииде во град Антиохию, идеже бе одержимый болезнию царь Константий; святитель главы его коснуся и сотвори здрава. Сему чудеси дивящеся, вопием ти:
Радуйся, егоже в сонном видении Ангел, яко целителя, яви царю;
радуйся, Божественыя ради любве трудный путь в старости восприявый.
Радуйся, цареву рабу, ударившему тя в ланиту, по заповеди Спасителя, другую подставивый;
радуйся, столпе смирения.
Радуйся, молитвами своими слезно просящему царю здравие даровавый;
радуйся, яко уничижением своим раба вразумил еси и немилостивый нрав его пременил еси.
Радуйся, яко благочестию и милосердию царя научил еси;
радуйся, яко, ненавидяй земная сокровища, злато царя отвергл еси.
Радуйся, яко ученика своего Трифиллиа от пристрастия к земным благам отвратил еси и сосудом благодати Божия соделал еси;
радуйся, яко пришедшу тебе в Александрию идоли падоша.
Радуйся, емуже и беси повинуются;
радуйся, яко от идолослужения многих отвратил еси.
Радуйся, Спиридоне, предивный чудотворче.
Кондак 11
Пение ангельское бысть, егда во храме приносил еси, святителю Спиридоне, вечерния молитвы Твоя, и не беша сослужащие тебе. Жителие же града, дивное пение слышавше, внидоша в храм и, никогоже видевше, с Горними силами воспеваху: Аллилуиа.
Икос 11
Светозарное солнце мирови, собеседник Ангелов был еси на земли, святителю Спиридоне; предав же дух твой в руце Божии, преселился еси в Горняя селения, моляся за мир пред Престолом Владыки. Мы же, живущии на земли, вопием ти:
Радуйся, яко тебе, еще живу сущу, сослужаху Ангели;
радуйся, псалмопение Архангелов слышавый.
Радуйся, видимый образе нашего преображения;
радуйся, яко недоставшу елею в храме Бог тебе ради с избытком лампады наполни тем.
Радуйся, лампадо Божественнаго сияния;
радуйся, сосуде благодати Божией, обильно, подобно елею, наполняющей душу твою.
Радуйся, неизсякаемый источниче, присно источающий всем токи благодати;
радуйся, о немже изумляются Ангели.
Радуйся, преслушание диакона в храме наказавый;
радуйся, тщеславившагося своим гласом, и гласа и языка лишивый.
Радуйся, яко, во время зноя, внезапу роса, снизшедшая свыше, священную твою главу прохлади;
радуйся, в знамении сем близость преставления своего провидевый.
Радуйся, Спиридоне, предивный чудотворче.
Кондак 12
Покров и прибежище бывый всем к тебе притекающим верным еще в житии твоем, ты, святителю, не оставил еси нас сирых и по твоем успении; Бог, побеждающий естества чин, сохрани святые мощи твоя нетленными во укрепление православныя веры и благочестия, в знамение безсмертия, Егоже прославляюще, вопием: Аллилуиа.
Икос 12
Воспеваем тя, святителю Божий, яко удивил еси мир чудесы, истекающими от святых мощей твоих. Вси бо с верою приходящии и лобызающии их получают вся благопотребная просимая. И мы, давшаго тебе крепость, венчавшаго тя венцем нетления и дейсивующаго тобою Бога прославляюще, вопием ти:
Радуйся, во время глада корабельником явивыйся, и пищу доставити повелевый;
радуйся, слепым, с верою притекшим к святым мощем твоим, зрение даровавый.
Радуйся, от неисцельныя болезни отрока исцеливый;
радуйся, беса из жены изгнавый и здраву ю сотворивый.
Радуйся, возбранный воеводо Керкиры;
радуйся, яко полчища злочестивых агарян изгнал еси и корабли их в пучине потопил еси.
Радуйся, егоже видеша окруженнаго сонмом Ангелов, в деснице меч державша и в трепет врагов приведша;
радуйся, создати себе храм, во еже совершати в нем литургию на пресном хлебе, воеводе возбранивый.
Радуйся, воеводу латинскаго лютою смертию поразивый;
радуйся, молниею изображение его в доме в Венеции сожегший.
Радуйся, отступльства и лжемудрования Запада посрамивый;
радуйся, единую православную веру быти истинную и спасительную для человеков утвердивый.
Радуйся, Спиридоне, предивный чудотворче.
Кондак 13
О пречудный святителю Христов, отче Спиридоне! Нынешнее наше моление прием, избави нас от всех бед и напастей, укрепи на враги страну нашу, даруй нам оставление прегрешений и изми от вечныя смерти всех вопиющих о тебе к Богу: Аллилуиа.
Этот кондак читается трижды, затем - Икос 1 и Кондак 1
Молитва первая Святому Спиридону Тримифунтскому
О помощи и заступлении в жизни, о здравии (здоровье), избавлении от бед и напастей
О великий и пречудный святителю Христов и чудотворче Спиридоне, Керкирская похвало, всея вселенныя светильниче пресветлый, теплый к Богу молитвенниче и всем к тебе прибегающим и с верою молящимся скоропредстательный заступниче!
Ты веру православную на Никейстем соборе посреде отцев преславно изъяснил еси, ты единство Святыя Троицы чудесною силою показал еси и еретиков до конца посрамил еси. Услыши нас, грешных, святителю Христов, молящихся тебе, и сильным твоим предстательством у Господа избави нас от всякаго злаго обстояния: от глада, потопа, огня и смертоносныя язвы.
Ты бо во временней жизни своей от всех сих бедствий избавлял еси людей твоих: от нашествия агарян и от глада страну твою сохранил еси, царя от неисцельнаго недуга избавил и многия грешники к покаянию привел еси, мертвых преславно воскрешал еси, за святость же жития твоего Ангелы невидимо в церкви поющия и сослужащия тебе имел еси.
Сице убо прослави тебе, вернаго Своего раба, Владыка Христос, яко вся тайная человеческая деяния дарова тебе разумети и обличати неправедно живущия. Многим в скудости и недостаточестве живущим ты усердно помогал еси, люди убогия изобильно во время глада напитал еси и ина многа знамения силою в тебе живущаго Духа Божия сотворил еси.
Сице и нас не остави, святителю Христов, поминай нас, чад своих, у Престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя и блаженства вечнаго в будущем веце сподобит нас, да выну возсылаем славу и благодарение Отцу и Сыну и Духу Святому, ныне и присно и во веки веков. Аминь.
Молитва вторая Святому Спиридону Тримифунтскому
О помощи, о деньгах, работе, жилье - всех земных благах. Читается также в печали и унынии, в болезни
О всеблаженный святителю Спиридоне, великий угодниче Христов и преславный чудотворче!
Предстояй на Небеси Престолу Божию с лики Ангел, призри милостивым оком на предстоящия зде люди и просящия сильныя твоея помощи. Умоли благоутробие Человеколюбца Бога, да не осудит нас по беззакониим нашим, но да сотворит с нами по милости Своей.
Испроси нам у Христа Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от щедраго Бога, но во славу Его и в прославление твоего заступления.
Избави всех верою несумненною к Богу приходящих от всяких бед душевных и телесных, от всех томлений и диавольских наветов. Буди печальным утешитель, недугующим врач, в напастех помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем крепкия помощи твоея требующим вся, яже ко спасению, полезная.
Яко да твоими молитвами наставляеми и соблюдаеми, достигнем в вечный покой и купно с тобою прославим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.
Молитва третья Святому Спиридону Тримифунтскому
О преблаженне святителю Спиридоне!
Умоли благосердие Человеколюбца Бога, да не осудит нас по беззакониям нашим, но да сотворит с нами по милости своей. Испроси нам, рабам Божиим (имена), у Христа и Бога наше мирное безмятежное житие, здравие душевное и телесное. Избави нас от всяких бед душевных и телесных, от всех томлений и диавольских наветов. Поминай нас у престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдная и мирныя и блаженства вечнаго в будущем веце сподобит нас, да непрестанно возсылаем славу и благодарение Отцу и Сыну и Духу Святому, ныне и присно, и во веки веков. Аминь.
Величание
Величаем тя, святителю отче Спиридоне, и чтим святую память твою, ты бо молиши за нас Христа Бога нашего.
Тропарь, глас 4
Собора Перваго показался еси поборник и чудотворец, богоносе Спиридоне отче наш. Темже мертву ты во гробе возгласив, и змию в злато претворил еси: и внегда пети тебе святыя молитвы, Ангелы сослужащыя тебе имел еси, священнейший. Слава Давшему тебе крепость, слава Венчавшему тя, слава Действующему тобою всем исцеления.
Кондак, глас 2
Любовию Христовою уязвився священнейший, ум вперив зарею Духа, детельным видением твоим деяние обрел еси Богоприятне, жертвенник Божественный быв, прося всем Божественнаго сияния.
АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «СКОРОПОСЛУШНИЦА»
Кондак 1
Избранной от всех родов Божией Матери и Царице, скоропослушливо внемлющей молитвам смиренным, и токи целебныя изливающей верным от иконы Своея святыя, благодарственное приносим пение: Ты же, всемилостивая Заступнице, преклонися благоутробно к гласом нашим хвалебным и от всяких бед свободи ны, зовущия Ти:
Радуйся, всеблагая Скоропослушнице, прошения наша во благо исполняющая.
Икос 1
Ангелов лицы благоговейно Тебе служат, и вся Небесныя Силы немолчными гласы Тя ублажают, Богородице Дево, яко рождшую ангелов Царя
Христа Бога, мы же грешнии, подражати им дерзающе и достойно благохвалити Тя недоумеюще, смиренномудренно вопием Ти:
Радуйся, неприступнаго Божества селение; радуйся, Ангельское непрестающее удивление.
Радуйся, Трапезо святая, хлебом жизни нас питающая; радуйся, маслино благоплодная, елеем милости сердца наша умащающая.
Радуйся, даров Божия благодати сокровищнице неистощимая; радуйся, чудес реко приснотекущая.
Радуйся, обидимых Заступнице; радуйся, печальных Утешительнице.
Радуйся, бедствующих Помощнице; радуйся, болящих Целительнице.
Радуйся, разслабленных укрепительнице; радуйся, плененных свободительнице.
Радуйся, всеблагая Скоропослушнице, прошения наша во благо исполняющая.
Кондак 2
Видяще милосердие Твое неисчетное, Владычице, и многая чудеса, Тобою явленная и присно являемая чрез святыя иконы Твоя, имиже, яко звездами богосветлыми, весь мир христианский украсила еси, величаем Тя, возвеличившую род наш Твоим благоволением, и с любовию покланяемся пречистаго лика Твоего изображению, зовуще Сыну Твоему Христу Богу: Аллилуиа.
Икос 2
Разум небесный открывая, Богородице, благоволила еси в земном жребии Твоем, Святей Горе Афонстей, многими чудесы прославити икону Твою, юже Сама Скоропослушницею наименовала еси гласом Божественным от нея изшедшим, да вси ведуще таковое Твое о ней благоволение, песненно Тебе вопиют:
Радуйся, милосердая всех нас о Христе Мати; радуйся, Духа Святаго жилище.
Радуйся, любве Божия к человеком проявление; радуйся, рода человеческаго возвышение.
Радуйся, светлая палато Бога Слова; радуйся, святая святых большая.
Радуйся, рождшая Божественнаго Агнца; радуйся, возрастившая нам клас живота.
Радуйся, брашна негиблющаго стамно всезлатая; радуйся, Питатальнице Питателя вселенныя.
Радуйся, яко предстательством Твоим спастися уповаем; радуйся, яко молитвами Твоими наследие небесное получити чаем.
Радуйся, всеблагая Скоропослушнице, прошения наша во благо исполняющая.
Кондак 3
Силою Божиею действующи, неблагоговейно ходившаго пред святою Твоею иконою Дохиарския обители трапезаря Нила слепотою и разслаблением тела наказала еси, Богородице Дево, да прочее не дерзает оскорбляти Тя в пречистем Твоем образе, егоже в залог благоволения Твоего всей Афонстей горе даровала еси милостиво, да все насельницы ея гласы преподобными вопиют рождшемуся от Тебе Богу Слову: Аллилуиа.
Икос 3
Имея любовь велию к людем, искупленным Кровию Сына Твоего и Бога, Владычице Всеблагая, покаяние трапезаря Нила милостиво прияла еси и исцеление ему от слепоты и разслабления даровала еси, да служит непрестанно Тебе и молитвы немолчныя приносит Ти пред многоцелебною Твоею иконою, взывая сице:
Радуйся, Иоакима и Анны прозябение святое; радуйся, рождшая Сокрушившаго главу древняго змия.
Радуйся, Преблагославенная в женах; радуйся, рождшая нетленно Спаса душ наших.
Радуйся, девство и рождество чудесно сочетавшая; радуйся, во обою непорочно Себе сохраньшая.
Радуйся, всея вселенныя велие чудо; радуйся, всех родов земных удивление.
Радуйся, согрешающих исправление; радуйся, кающихся в добродетели утверждение.
Радуйся, непомятозлобная наказательнице; радуйся, благосердая вразумительнице.
Радуйся, всеблагая Скоропослушнице, прошения наша во благо исполняющая.
Кондак 4
Бури житейския избежавшии и в тихое пристанище спасения на Гору Афонскую притекшии, обретают зде утешение благодатное и помощь Божественную от святыя иконы Твоея, Богородице, от неяже лучи чудес испущаеши, и токи милости Твоея изливаеши неоскудно. Темже вси хотящии в пустынех Афона жати спасение, величая Матерния щедроты Твоя, благодарственно воспевают Богу: Аллилуиа.
Икос 4
Слышав глас Божественный от святыя иконы Твоея, Владычице, трапезарь Нил позна Тя Скоропослушницу быти всем, с верою и любовию притекающим к чудотворному Твоему образу, и, прияв от него вразумление своему невежествию и прозрение своим слепотствующим очесем, возгласи Тебе благодарственно от души:
Радуйся, временным наказанием невежд умудряющая; радуйся, согрешающих покаяние милостиво приемлющая.
Радуйся, на путь исправления заблуждающихся направляющая; радуйся, раны греховныя благоутробно врачующая.
Радуйся, в нерадении коснеющих любвеобильно обличающая; радуйся, горестию телесных страданий вечных мук избавляющая.
Радуйся, волнение страстей утишающая; радуйся, руку помощи Твоея погибающим простирающая.
Радуйся, безнадежных надеждо; радуйся, скорбящих отрадо.
Радуйся, нагих одеяние; радуйся, сирых призрение.
Радуйся, всеблагая Скоропослушнице, прошения наша во благо исполняющая.
Кондак 5
Боговещанныя глаголы Твоея уведевше, иноцы обители Дохиарския Тебе, Божественней Скоропослушнице, храм соорудиша при трапезе, идеже чудотворная икона Твоя пребывает, Пречистая Дево, и вся верныя утешает знаменьми Твоея милости, еяже не лиши и нас смиренных, по долгу Тебе воспевающих, и вопиющих чудес Творцу Богу: Аллилуиа.
Икос 5
Видевше токи чудес, от святыя иконы Твоея Скоропослушницы источаемыя, вси иноцы Горы Афонския стекахуся к ней на поклонение. Ты же, Мати Божия, всем, по коегождо потребе, дары милости Твоея неоскудно подавала еси от чудотворнаго Твоего образа, подвизая благодарно вопити Тебе:
Радуйся, Мати милосердия и щедрот; радуйся, одушевленный Престоле Вседержителя.
Радуйся, Сыну Божию плоть заимодавшая; радуйся, чертоже безсеменнаго уневещения.
Радуйся, Безплотнаго воплотившая; радуйся, Бога с человеки соединившая.
Радуйся, преподобных всежелательное зрение; радуйся, постников Божественное радование.
Радуйся, пустынножителей тихое веселие; радуйся, иноков крепкое упование.
Радуйся, демонския полки побеждающая; радуйся, враги спасения человеческаго посрамляющая.
Радуйся, всеблагая Скоропослушнице, прошения наша во благо исполняющая.
Кондак 6
Проповедует Гора Афонская милости и чудеса Твоя, Преблагословенная Мати Господа нашего, и светло красуется многими чудотворными Твоими иконами, посреде коих икона Твоя, Скоропослушница Тобою нареченная, яко луна полная, лучами чудес немерцаемо сияет, просвещая души наша светом Божия благодати и подвизая нас хвалебно взывати прославльшему Тя Триединому Богу: Аллилуиа.
Икос 6
Возсиял еси в пречистей иконе Твоей, Марие Богородице, свет спасения всем, блуждающим во тьме грехов и страстей, и сию нарекла еси Скоропослушницею, молящимся пред нею с верою и благоговением от души, скорую помощь Твою подающи вопиющим Ти таковая:
Радуйся, молние, души просвещающая; радуйся, громе, соблазняющия устрашающая.
Радуйся, благоотишное прибежище утомленных треволнением житейскаго моря; радуйся, небурное пристанище обуреваемых волнами страстей.
Радуйся, юных наставнице целомудрия; радуйся, покрове и ограждение девства.
Радуйся, окаменение сердечное умягчающая; радуйся, хладность душевную благодатно согревающая.
Радуйся, на стезю спасения верных наставляющая; радуйся, от путей погибельных претыкающихся удаляющая.
Радуйся, Споручнице наша к Сыну Твоему и Богу; радуйся, присно умоляющая Его о помиловании нас грешных.
Радуйся, всеблагая Скоропослушнице, прошения наша во благо исполняющая.
Кондак 7
Хотящи всем показати любовь Твою велию к христианскому роду, Богородице Преблагая, в жребий Твой земный Гору Афонскую избрала еси и в ней селения иноческая умножила еси, да вси обуреваемии мирскою суетою, возмогут обретати зде тихое и удобное пристанище ко спасению, и Тобою вспомоществуеми, сподобятся наследия Небеснаго, и пети со святыми Пресвятей Троице: Аллилуиа.
Икос 7
Новое знамение милосердия Твоего явила еси, Владычице, в чудеснем прославлении святыя иконы Твоея Скоропослушницы, не токмо иноком Горы Афонския, но и всем православным христианом, в нихже благоговейно чествуется сея иконы Твоея изображение, да вси Тебе зовут:
Радуйся, Бога нашего Мати; радуйся, в рождестве и по рождестве Дево.
Радуйся, яко Тя блажат вси роди; радуйся, яко сотвори Тебе величие Сильный.
Радуйся, яко призре на смирение Твое Господь; радуйся, яко возжеле доброты Твоея Царь царей.
Радуйся, Дщи благословенная Отца Небеснаго; радуйся, Родительнице неискусомужная Сына Предвечнаго.
Радуйся, приятелище непорочное Духа Святаго; радуйся, Таиннице Божественныя благодати.
Радуйся, горняго мира украшение; радуйся, дольняго мира заступление.
Радуйся, всеблагая Скоропослушнице, прошения наша во благо исполняющая.
Кондак 8
Странники и пришельцы есмы на земли и, по глаголу апостола, не имамы зде пребывающаго града, но к кому прибегнем, Владычице, в скорбех странствия нашего, аще не к Тебе, Всеблагая? Не отвержи нас, Мати Божия, не рцы нам: «Не вем вас, грехов ради ваших!», но помилуй нас, сирых и безпомощных, и приими нас в вечныя кровы, Покровительнице наша, да радостно вопием во славе небесней Царю славы Христу: Аллилуиа.
Икос 8
Всем верным утешительно есть взирати на святую икону Твою, Владычице, на нейже зрим Тя, на руку Твоею держащую Предвечнаго Младенца Господа нашего Иисуса Христа, Емуже покланяющеся боголепно, яко Творцу и Богу нашему, Тебе, истинней Богородице, умиленно глаголем:
Радуйся, обрадованная архангельским благовещением, Приснодево; радуйся, Невесто Неневестная.
Радуйся, Мати Света умнаго, всех души просвещающаго; радуйся, Престоле одушевленный Небесе и земли Творца.
Радуйся, кроткая голубице; радуйся, непорочная агнице.
Радуйся, чаше, черплющая радость; радуйся, неисчерпаемый сосуде воды животныя.
Радуйся, мироположнице благоухания Христова; радуйся, Еюже злосмрадие страстей наших отгонится.
Радуйся, Еюже познахом Сына Божия; радуйся, Еюже научихомся покланятися Триединому Богу.
Радуйся, всеблагая Скоропослушнице, прошения наша во благо исполняющая.
Кондак 9
Вси роди блажат Тя по долгу, благословенная Марие Богородице, от востока бо и до запада хвально имя Твое, иноков же лицы Покровительницу Тя свою именуют, наипаче подвизающиеся в жребии Твоем Горе Афонстей, юже особым благоволением Твоим осенила еси, многая чудеса в ней содевающи, и милости Твоя богатыя насельником ея являющи, да благодарно вопиют о Тебе Богу: Аллилуиа.
Икос 9
Витии суемудреннии недоумевают познати тайну Твоего приснодевства, Богородице, ниже могут изъяснити силу чудотворную, от икон Твоих проистекающую, во исцеление недужных и на всяку пользу душевную и телесную человеком. Мы же православно и несомненно Приснодевою Тя исповедующе, верно покланяемся иконе Твоей святей и вопием Ти сице:
Радуйся, неверных сомнительное слышание; радуйся, верных известная похвало.
Радуйся, из боку чисту Христа нетленно рождшая; радуйся, ключи девства невредившая в Рождестве Твоем.
Радуйся, Мати и Дево преблагословенная; радуйся, Богородице препрославленная.
Радуйся, дев величание; радуйся, матерей присное радование.
Радуйся, едина непорочная и добрая в женах; радуйся, рождшая обетованнаго Сокрушителя главы змия.
Радуйся, падших прародителей осуждения древняго избавльшая; радуйся, Эдем, заключенный человеком, отверзшая Рождеством Твоим.
Радуйся, всеблагая Скоропослушнице, прошения наша во благо исполняющая.
Кондак 10
Спасение устрояющи христоименитым людем, благоволила еси, Богородице, земный жребий Твой, Гору Афонскую, в население иноком определити, и рекла еси в видении первому пустынножителю афонскому, преподобному Петру, быти Горе сей в жилище иноком присное, обетовании благими утешивши его, яко будеши Помощница и Покровительница всем, подвизающимся в ней богоугодно, дарами потребными их снабдевающи и от всяких бед спасающи, да невозбранно поют Богу: Аллилуиа.
Икос 10
Стена еси заступления, Дево, иноком православным и всем подвижником девства и чистоты. Темже жребий Твой земный, Гору Афонскую, невходну женам сотворила еси, да без соблазна греховнаго пребывают в ней иноцы, на Тебе едину по Бозе надежду спасения возлагающе и Тебе зовуще сице:
Радуйся, неувядаемый цвете девства; радуйся, крине сельный чистоты.
Радуйся, светоносная сене небесная, ревнителей чистоты осеняющая; радуйся, премудрости Божия свитче, рачителей целомудрия умудряющая.
Радуйся, иноком благоподвизающимся Ходатаице спасения; радуйся, пустынножителей Горы Афонския Покрове и Ограждение.
Радуйся, радость благодатную изливающая в сердца боголюбивыя; радуйся, утешение духовное подающая душам огорченным.
Радуйся, младопитательнице дев и безматерних сирот; радуйся, любовию Жениха безсмертнаго девственная ликостояния услаждающая.
Радуйся, в тяжкой борьбе с приражениями страстей плотских крепкая помощнице; радуйся, обителей иноческих неусыпная блюстительнице.
Радуйся, всеблагая Скоропослушнице, прошения наша во благо исполняющая.
Кондак 11
Пение наше смиренное, от полноты любве и усердия Тебе приносимое, не презри, Чистая, и не отвратися от нас, оскверненных многими грехми, но помози нам, Всеблагая, покаянием очиститися от скверны греховныя и преуспети в чистем и богоугоднем житии, Тя подвигоположницу и помощницу в сем имуще, да возможем достойно и праведно вопити ко Господу: Аллилуиа.
Икос 11
Светлыми лучами чудес святая икона Твоя немерцаемо сияет, Богородице Дево, и весь мир благодатно озаряет, прогоняющи всякое вражие действо силою Божиею, от нея исходящею; темже радуемся мы, грешнии, имуще таковый залог Твоего к нам благоволения, и Тебе, Скоропослушнице молений наших, благодарственно взываем:
Радуйся, утро спасения нам возсиявшая; радуйся, рождшая Жениха безсмертнаго душ человеческих.
Радуйся, желания наша богоугодная исполняющая; радуйся, в скорбех и обстояниих на помощь к нам благоутробно ускоряющая.
Радуйся, раю мысленный, всякаго утешения духовнаго преисполненный; радуйся, от исполнения Твоего и нам капли утешения источающая.
Радуйся, зной страстей наших прохлаждающая; радуйся, благодатное безстрастие ищущим его усердно подающая.
Радуйся, всех в чистоте целомудрия живущих зело любящая; радуйся, в сониих и видениих избранники Божия посещающая.
Радуйся, всеблагая Скоропослушнице, прошения наша во благо исполняющая.
Кондак 12
Благодать Божия, присущая святей иконе Твоей, Скоропослушница Тобою нареченней, Богомати Владычице, влечет к ней всех скорбящих и обремененных, и нетщи отходят они от сего источника Твоих милостей и щедрот: в скорбех отраду, в напастех защиту, в болезнех цельбу неоскудно получая от чудотворнаго образа Твоего, Всеблагая, и благодарственно вопиют благих подателю Богу: Аллилуиа.
Икос 12
Поюще чудеса Твоя, Владычице, и велию милость Твою к христианскому роду, вемы, яко недовольни есмы к достойному прославлению Тебе, Честнейшей Херувим и Славнейшей без сравнения Серафим, обаче надеющеся на безприкладное милосердие Твое, Всеблагая, смиренномудренно приносим Ти песни таковыя:
Радуйся, пристанище небурное подвижников благочестия; радуйся, безмолвствующих сладкая собеседнице.
Радуйся, в пустынех и горах скитающихся благодатная отрадо; радуйся, тайных среди мира рабов Божиих тайное вразумление.
Радуйся, грешников кающихся с Богом примирение; радуйся, Горы Афонския верховная Правительнице.
Радуйся, Петра пустыннолюбиваго посещением Твоим зде озарившая; радуйся, Афанасиа богомудраго явлением Твоим облагодатствовавшая.
Радуйся, многия преподобныя Афонския славою небесною прославльшая; радуйся, насельником Горы сея особую любовь Твою являющая.
Радуйся, телес наших безмездная Целительнице; радуйся, душ наших к Царствию Горнему Путеводительнице.
Радуйся, всеблагая Скоропослушнице, прошения наша во благо исполняющая.
Кондак 13
О Всепетая Мати, Скоропослушницею нарекшаяся во святей иконе Твоей, Богородице Марие! Приими милостивно сие малое моление наше, еже от усердия нашего принесохом Ти с верою и любовию, и умоли приснопокланяемую Троицу избавити ны геенны огненныя, тьмы несветимыя и мучения вечнаго: да предстательством Твоим унаследим Царствие Небесное, и сподобимся со святыми пети Богу: Аллилуиа.
Этот кондак читается трижды, затем 1-й икос «Ангелов лицы…» и 1-й кондак «Избранной от всех родов…».
Молитва
Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех проявившая, море явльшаяся Божественных дарований и чудес приснотекущая река, изливающая благодать всем, с верою к Тебе прибегающим! Чудотворному Твоему образу припадающе, молимся Тебе, всещедрей Матери человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити все, еже на пользу во утешение и спасение, коемуждо устрояющи. Посети, Преблагая, рабы Твоя благодатию Твоею, подаждь недугующим цельбу и совершенное здравие, обуреваемым тишину, плененным свободу и различными образы страждущих утеши; избави Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно, во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.
Тропарь, глас 4
К Богородице притецем, сущии в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся. Тебе бо раби Твои в нуждах готовую Помощницу имамы.
Кондак, глас 8
В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.
Величание
Величаем Тя, Пресвятая Дево, Богоизбранная Отроковице, и чтим образ твой святый, имже точиши исцеления всем с верою притекающим.
Акафист священномученику Харлампию
Кондак 1
Избранному страстотерпцу и угоднику Божию, оросившему землю честною своею кровию и плодородие земли от Бога испросившему, похвальная из глубины души возглашаем пения. Ты же имеяй велие дерзновение ко Господу, от всяких нас бед свободи, зовущих:
Радуйся, священномучениче Харалампие, милосердый наш пред Богом заступниче и предивный чудотворче.
Икос 1
Ангели на небеси радовахуся непорочному житию твоему, священномучениче Харалампие, ты бо последовал еси святым пророком и Апостолом, наставляя люди на путь спасения. Сего ради вопием ти:
Радуйся, великий светильниче Церкве; радуйся, проповедниче правды.
Радуйся, словес жизни вечныя учителю; радуйся, идолослужения обличителю.
Радуйся, имже сатана посрамляется; радуйся, имже вера Христова прославляется.
Радуйся, яко именем Христовым вражию силу низложил еси; радуйся, яко силою Божиею козни бесовския разрушил еси.
Радуйся, священномучениче Харалампие, милосердый наш пред Богом заступниче и предивный чудотворче.
Кондак 2
Видяще житие твое, благочестия и чистоты исполненное, и слышаще пламенную проповедь твою, служителие Господа Иисуса Христа, укреплени бывше в вере и благочестии, возрадовашася, поюще всех Творцу: Аллилуиа.
Икос 2
Разумом, просвещенным от Господа, исполнен быв и долголетия мудростию украшен, не восхотел еси послушати совета Лукиана игемона, еже приступити с жертвами к богом бездушным, и велиих мучений не убоялся еси. Темже вопием ти:
Радуйся, угрозы Лукиана презревый; радуйся, постом и молитвою долголетие стяжавый.
Радуйся, благ невидимых взыскателю; радуйся, креста Христова победный носителю.
Радуйся, мучители твоя возлюбивый; радуйся, сердца их ко Христу обративый.
Радуйся, имже истинная вера утвердися; радуйся, имже прелесть бесовская посрамися.
Радуйся, священномучениче Харалампие, милосердый наш пред Богом заступниче и предивный чудотворче.
Кондак 3
Силою Вышняго укреплен быв, победил еси велия мучения, и стружем ногтьми железными, молился еси ко Господу, исцеляя болезни твоих мучителей и воспевая Богу песнь: Аллилуиа.
Икос 3
Имеяй велию милость Господню, удостоился еси, священномучениче Харалампие, гласа Божия, от облака исходяща, Емуже внемлюще, благоговейно рцем:
Радуйся, светильниче земный; радуйся, в небесныя обители преселивыйся.
Радуйся, собеседциче Ангелом; радуйся, сожителю пророком.
Радуйся, Апостолом сопрестольниче; радуйся, совоинственниче мучеником.
Радуйся, беседы Господни удостоивыйся; радуйся, яко услыша Господь молитвы твоя.
Радуйся, священномучениче Харалампие, милосердый наш пред Богом заступниче и предивный чудотворче.
Кондак 4
Буря велия грады, веси и всяк злак сельный разрушает; горшия бури житейския злобы, неверия и злодеяний человеческих души наша смущают и житие наше мраком покрывают. Но помози нам, преславный священномучениче, почитающим подвиги и страдания твоя и поющим о тебе дивному во святых Своих Богу: Аллилуиа.
Икос 4
Слышав нечестивый царь римский Севир, яко в мучениих неодолен явился еси, исполнися гнева; ты же, долготерпеливе, егда острое железное гвоздие вбито бысть в честное тело твое, ничтоже глаголя вопреки мучителем твоим, вся сия в веселии и радости претерпел еси. Сего ради ублажаем долготерпение твое звании сими:
Радуйся, образе кротости духовныя; радуйся, долготерпением Господу Иисусу Христу подражавый.
Радуйся, яко и безсловесная тварь предивному терпению твоему ужасашеся; радуйся, яко Господь Бог с тобою в мучениих твоих пребыл есть.
Радуйся, множество людей долготерпением твоим приведый ко Господу; радуйся, от Господа прославленный.
Радуйся, исцелений источниче; радуйся, человеком помощниче.
Радуйся, Харалампие, милосердый наш пред Богом заступниче и предивный чудотворче.
Кондак 5
Боготечная звезда был еси жене некоей, яже, видящи страдания твоя и умилившися сердцем, велегласно возгласи: человече Божий, честна есть старость твоя, и Бог с тобою есть, в Негоже веровати имам, поюще Ему: Аллилуиа.
Икос 5
Видя царь Севир во исцелении некоего человека, бесом одержима, чудодейственную силу Христову, в тебе, досточудный священномучениче, обитающую, зело удивися и рече: воистину велик есть Бог христианский! Сего ради и мы, восхваляюще страдания и чудеса твоя, преславный исповедниче Христов, взываем ти радостно:
Радуйся, чудотворче предивный; радуйся, веры поборниче победоносный.
Радуйся, от огненнаго жжения невредим пребывый; радуйся, чудесы твоими неверующия люди светом богопознания озаривый.
Радуйся, житием твоим имя Божие прославивый; радуйся, егоже, яко добраго воина Христова, диавол трепещет.
Радуйся, егоже молитвою недузи врачуются; радуйся, егоже предстательством вернии жизнь вечную наследствуют.
Радуйся, Харалампие, милосердый наш пред Богом заступниче и предивный чудотворче.
Кондак 6
Проповедник мужественный был еси, всехвальный Харалампие, егда глаголал еси цареви: много мя пользуют муки; елико бо тело мое ранами раздробляется, толико радуется во мне дух мой. Внемлюще словесем сим, многое множество людей исповедаху Господа Иисуса Христа и венец мученический прияша, поюще Богу: Аллилуиа.
Икос 6
Возсия Божие всемогущество и явися страшное Божие прещение, егда нечестивии твои мучителие хулы на Христа Господа глаголаша безстудно: земля, яко лист, колебашеся, и слышахуся свыше от облак страшнии гласи, и бяху блистания и громи; молитву же тебе сотворшу, преста Божие страшное прещение. Темже вопием ти:
Радуйся, гордых обличителю; радуйся, нищеты духовныя учителю.
Радуйся, хульников имене Господня низложителю; радуйся, от гнева Господня человеки избавляяй.
Радуйся, блистания и громы небесныя молитвою утишаяй; радуйся, омертвевшия от страха человеки воскресивый.
Радуйся, велие незлобие к мучителем твоим явивый; радуйся, егоже ради Господь Бог возгреме во облацех воздушных.
Радуйся, Харалампие, милосердый наш пред Богом заступниче и предивный чудотворче.
Кондак 7
Хотя спасти чистую душу дщере царевы Галины, той яви тя Господь, о Харалампие, яко Ангела светла, мудра учителя и Апостола веры Христовы. И внемлющи словесем твоим, блаженная Галина умилися сердцем и Богу возгласи: Аллилуиа.
Икос 7
Новаго тя Иосифа показа Господь Бог, егда вразуми тя известити, премудре, сказание бывшаго блаженней Галине соннаго видения. Виде бо множество водное, еже есть дарование Духа Святаго, виде сад велик при водах многих, рай Господень, и в нем виде виноград красен, праведных водворение, и Стража места того, Христа Бога, вземлюща овцу на рамена Своя. Темже зовем ти:
Радуйся, старцев украшение; радуйся, приятелище даров Духа Святаго.
Радуйся, яко с лики ангельскими славословиши Господа; радуйся, яко рай Господень и жизнь вечную стяжал еси.
Радуйся, Пастыреначальника Христа Бога нашего служителю; радуйся, добрый стада Христова пастырю и всего мира молитвенниче.
Радуйся, винограда Господня украшение; радуйся, Церкве Христовы утверждение.
Радуйся, Харалампие, милосердый наш пред Богом заступниче и предивный чудотворче.
Кондак 8
Странствия земнаго течение совершая, не восхотел еси волю нечестивых идолослужителей сотворити и от веры истинныя отступити, но вразумляяй мучители твоя Богомудрыми словесы твоими, страдания за Христа восприял еси лютая, поя Господу Богу песнь победную: Аллилуиа.
Икос 8
Все сердце свое яростию исполнив, вдаде тя царь нечестивый некоей жене вдовице на поругание. Ты же, святе Харалампие, входя в дом ея, восклонился еси на некий при храмине столп, и абие сухий той столп прозябе; тогда жена тая, зело ужаснувшися, к Богу обратися. Мы же во умилении сердца взываем ти:
Радуйся, Харалампие, светильниче всесветлый; радуйся, угодниче Христов, благодатию преисполненный.
Радуйся, яко и самое имя твое чудным житием твоим оправдися; радуйся, вдовиц предстательство и заступление.
Радуйся, учением твоим многия ко Христу приведый; радуйся, сирых надеждо и укрепление.
Радуйся, мучеников красото; радуйся, человеколюбия зерцало.
Радуйся, Харалампие, милосердый наш пред Богом заступниче и предивный чудотворче.
Кондак 9
Все богатство ума твоего, вся благодатныя дары, яже приял еси от Господа Бога, вдал еси, святе Харалампие, на служение человеком, научая всех вере и благочестию, и в час кончины твоея святыя не о себе самем молился еси, но о спасении и благоденствии всех, почитающих святую память твою, да наслаждаются дарований Господа Бога, поюще Ему: Аллилуиа.
Икос 9
Витии многовещаннии не возмогоша воспети достойно величие души твоея и неизреченное твое милосердие, имже дивящеся, мы, недостойнии, в простоте сердца зовем:
Радуйся, светильниче, мрак греховный от людей светом веры отгоняяй; радуйся, венцем мученическим паче звезд небесных блистаяй.
Радуйся, молитвами твоими прозябения хлебов у Христа Бога испрошаяй; радуйся, яко кровь твою честную на землю пролиял еси.
Радуйся, яко тою кровию щедроты Господни нам грешным стяжал еси; радуйся, яко Господь рекл есть тебе: буди глагол твой исцеление болящим.
Радуйся, яко приято бысть Богом моление устен твоих; радуйся, скорбящих благодатное утешение.
Радуйся, Харалампие, милосердый наш пред Богом заступниче и предивный чудотворче.
Кондак 10
Спасти хотя душу твою, ни во чтоже тело твое вменил еси, святый мучениче, и мечному на тя осуждению радовался еси, поя благодеющему Господу Богу: Аллилуиа.
Икос 10
Стена и прибежище бысть ти, великий Харалампие, Господь Бог, явивыйся ти во славе Своей в час блаженныя кончины твоея. Темже зовем ти:
Радуйся, друже Господень; радуйся, яко Господь дает ти, яже просиши.
Радуйся, страшную славу Господню видевый; радуйся, защитниче людей от глада и мора.
Радуйся, тлетворнаго воздуха, погубляющаго плоды земныя, силою Божиею отгонителю; радуйся, трудолюбия учителю.
Радуйся, яко о здравии телес и душ спасении ходатайствуеши; радуйся, яко и о скотех, созданных на потребу человеков, печешися.
Радуйся, Харалампие, милосердый наш пред Богом заступниче и предивный чудотворче.
Кондак 11
Пение умиленное аще и премногое приносим ти, чудотворче, ничтоже творим равно чудесем твоим и многому твоему к нам грешным милосердию, имже дивящеся, Господеви зовем: Аллилуиа.
Икос 11
Светильник путеводителен буди нам, Харалампие, во тьме греховней ходящим, и молися ко Господу, еже отъяти от нас всякое суеверие, просветити наш ум светом евангелия и учений, полезных ко труду земледельца и во всякой вещи, да просветлени умом, во умилении сердца зовем ти:
Радуйся, неизсякаемое миро, на труд человеч излиянное; радуйся, весно Господня благоуханная.
Радуйся, рая Господня древо прекрасное; радуйся, молитву, яко кадило благовонное, Господеви возсылаяй.
Радуйся, дыханием молитвы твоея святыя землю согреваяй; радуйся, предстательством твоим пред Господем росою плоды земныя орошаяй.
Радуйся, земледельцев покровителю; радуйся, жизни их строителю.
Радуйся, Харалампие, милосердый наш пред Богом заступниче и предивный чудотворче.
Кондак 12
Благодать, обещанную ти Господем Богом, еже исполнитися всякому прошению твоему, ведая, — Молю Тя, Господи, — рекл еси, — даждь славу имени Твоему: идеже положены будут моя мощи, да не будет на месте том глад и мор, или тлетворный воздух, погубляяй плоды, но мир в человецех и телесем здравие, и душам спасение, и плодов земных изобилие да будут. О Господи Боже наш! Излий благодать Твою сию и на всех нас, поющих Ти: Аллилуиа.
Икос 12
Поюще твоя чудеса, преславне Харалампие, славим долготерпение, страдания и дивную кончину твою, и чудящеся милосердию твоему, сице зовем ти:
Радуйся, о дождех благовременных пред Господем ходатайствуяй; радуйся, молитвами твоими от бури и града нас сохраняяй.
Радуйся, ты бо просил еси плодородие месту, идеже пострадал еси; радуйся, ты бо молился еси ко Господу, да низпослет Он, Милосердый, на труд земледельца Свое благословение.
Радуйся, страдальче непобедимый и непреодоленный; радуйся, священниче Божий, о всем мире ходатайствуяй.
Радуйся, надеждо всех молящихся тебе; радуйся, земледельцев радость светлая.
Радуйся, Харалампие, милосердый наш пред Богом заступниче и предивный чудотворче.
Кондак 13
О предивный Харалампие, заступниче наш премилосердый! Вонми гласу недостойныя молитвы нашея и молися за ны ко Господу, еже сохранити нас от глада и мора и междоусобныя брани, и на всяк мирный труд человеч низпослати Божие благословение, да во веки воспеваем Ему: Аллилуиа.
Этот кондак читается трижды, затем 1-й икос «Ангели на небеси …» и 1-й кондак «Избранному страстотерпцу …».
Молитва первая
О священная и многострадальная главо, пастырю добрый словесных овец Христовых, священномучениче Христов Харалампие, Магнисийская похвало и славо вселенныя, всемирный светильниче и великий наш заступниче и помощниче в скорбех, бедах и всяких нуждах! Услыши нас грешных, к тебе прибегающих и молящихся, и избави нас от всякаго злаго обстояния. Ты бо приял еси от Господа благодать и силу велику за многия и нужныя страдания твоя и терпение, еже всюду и во всем нам помогати, и наипаче идеже память твоя почитаема будет бдением, пением и усердным молением. Сицевая благодать дадеся ти, священномучениче Христов, от явльшагося ти Господа Царя славы по твоему испрошению. Егда на мечное тя усечение осудиша, услышал еси превожделенный и сладчайший оный глас, глаголющий тебе: Прииди, Харалампие, друже Мой, многия муки имене ради Моего претерпевый, и проси у Мене, еже хощеши, и Аз дам ти. Ты же, великий светильниче, рекл еси Христу Господу усты своими: Господи мой, велико убо мне есть от Тебе, Света невечерняго, дарование сие. Аще угодно есть величеству Твоему, молю Тя, благоволи даровати ми сицевую милость Свою: да идеже положены будут мощи моя и почитаема будет память страдания моего, не будет на месте том ни глада, ни мора, или тлетворнаго воздуха, погубляющего плоды, но да будет паче на месте оном мир, здравие телесем и душам спасение, изобилие пшеницы, вина, и елеа и умножение скотов, яже на потребу человеком. Ты же паки, угодниче Христов Харалампие многострадальниче, глас Господен услышал еси, вещающий тебе: Буди по прошению твоему, преславный Мой воине. И абие по глаголании сем Господнем предал еси душу свою без мечнаго посечения, и пойде во след Христа Господа со славою многою, Ангелом убо сретающим и провождающим ю до Престола Господня с радостию великою. И тако приял еси венец славы от Божественныя руки Его с лики святых, вечно славящих пресвятое имя Господа. И тамо, во славе небесней пребывая, призри, угодниче Божий, и на нас грешных, молящихся тебе, и воспомяни нас пред Господем, еже даровати нам на потребу велия Его милости в безконечныя веки. Аминь.
Молитва вторая
О пречудный священномучениче Харалампие, страстотерпче непреодоленный, священниче Божий, о всем мире ходатайствуяй! Призри на моление нас, почитающих святую память твою. Испроси нам у Господа Бога прощение грехов наших, да не до конца прогневается на нас Господь: согрешихом бо и недостойни явихомся милосердия Божия. Моли о нас Господа Бога, да низпослет мир на грады и веси наша, да избавит нас от нашествия иноплеменников, междуусобныя брани и всяких раздоров и нестроений! Утверди, священномучениче, веру и благочестие во всех чадех православныя христианския Церкве, и да избавит нас Господь Бог от ересей, расколов и всякаго суеверия. О милосердный мучениче! Молися за ны ко Господу, да сохранит нас от глада и всяких болезней, и да подаст нам изобилие плодов земных, скотов умножение на потребу человеком и вся нам полезная: наипаче же да сподобимся, молитвами твоими, Небеснаго Царствия Христа Бога нашего, Емуже честь и поклонение подобает, со Безначальным его Отцем и Пресвятым Духом, ныне и присно, и во веки веков. Аминь.
Молитва третья
О, священнейшая главо, пастырю добрый словесных овец Христовых, священномучениче Христов Харалампие, великий о нас заступниче в скорбех и бедах и во всех нуждах! Услыши нас, грешных и недостойных раб твоих, молящихся тебе, да твоими всесильными молитвами Всеблагий Господь избавит ны от всякаго злаго обстояния, простит вся согрешения, вольная и невольная, сподобит ны прочая лета жизни нашея скончати в соблюдении заповедей Его и покаянии. Испроси, угодниче Божий, да пребудет благословение Царя Небеснаго над благословенною им Россиею. Ты бо приял еси еще в житии своем от Господа силу всем притекающим к тебе с мольбою подавати потребное, темже и старцы, и возрастнии, и дети приимаху исцеления ради ходатайства твоего, угодниче, пред Престолом Господа. Егда же на мечное тя усечение осудиша, слышал еси превожделенный и сладчайший глас Господа, глаголющ к тебе сицевая: прииди, Харалампие, друже мой, многая ради Имене Моего претерпевый, проси у Мене, чесо хощеши, и дам ти. Ты же, великий светильниче, рекл еси Ему усты своими: Господи, аще угодно Тебе есть, молю Тя, даждь славу Имени Твоему, идеже положены будут моя мощи и память моя имать почитатися, да не будет на месте том глад и мор или тлетворный воздух, погубляющ плоды, но да будет паче на местех тех мир, телесем здравие и душам спасение, изобилие же пшеницы и вина и скотов умножение на потребу человеком. И тако по прошению твоему приял еси от Господа велию благодать. На твоя моления, на тя, священномучениче Христов Харалампие, уповаем, получити велию милость от Господа в безконечный век. Аминь.
Тропарь, глас 4.
Яко столп избранный Церкве Христовой и светильник присносветлый всея вселенныя, премудре показася, Харалампие, возсия в мире мучением, разруши идольское мракобесие, блаженне, сего ради явися предстатель Христу, молися спастися нам.
Тропарь, глас 4.
К страстотерпцу Харалампию приступим и образу его поклонимся, от сердца вопиюще: мучениче Харалампие и отче, от всякаго обстояния и всех бед своих раб избави нас, в церкве твоей выну пребывающих.
Кондак, глас 8.
Подобствовав благодатию священства, славне, Церковь светло украсил еси Божественным страданием, еже за Христа приял еси доблественно, радуяся, Харалампие, честный светильниче всемирный, осияваяй концы, яко непобедимый.
Акафиста святому архиепископу Луке Крымскому
Кондак, глас 1
Якоже звезда всесветлая, добродетельми сияющи, был еси святителю, душу же равноангельну сотворил еси, сего ради святительства саном почется, во изгнании же от безбожных много пострадал еси и непоколебим верою пребыв, врачебною мудростию многия исцелил еси. Темже ныне честное тело твое, от земленых недр обретенное дивно, Господь прослави, да вси вернии вопием ти: радуйся, отче святителю Луко, земли Крымския похвало и утверждение.
Кондак 1
Возбранный святителю Церкве Православныя и исповедниче, возсиявый стране нашей в земли Крымстей, яко светозарное светило, добре потрудивыйся и за имя Христово гонение претерпевый, прославляюще прославльшаго тя Господа, даровавшаго нам тебе новаго молитвенника и помощника, похвальное воспеваем ти пение; ты же, яко имеяй велие дерзновение ко Владыце небесе и земли, от всяких недугов душевных и телесных свободи нас и добре стояти во Православии укрепи, да вси во умилении зовем ти:
Радуйся, святителю Крымский, исповедниче Луко, врачу благий и милостивый.
Икос 1
Ангелов собеседниче и человеков наставниче, Луко преславный, подобне евангелисту и Апостолу Луке, емуже тезоименит сый, от Бога дар целити недуги человеческия приял еси, во врачевании болезней ближних многия труды подъемля, и, плоть нося, о плоти нерадел еси, делы добрыми Отца Небеснаго прославил еси. Темже благодарне во умилении зовем ти:
Радуйся, от юности разум свой игу Христову покоривый.
Радуйся, пречестное Святыя Троицы селение бывый.
Радуйся, блаженство милостивых, по слову Господа, унаследовавый.
Радуйся, верою Христовою и знанием богодарованным многия недужныя исцеливый.
Радуйся, страждущих недуги телесными врачу милосердный.
Радуйся, во дни брани вождей и воинов исцелителю.
Радуйся, всех врачев наставниче.
Радуйся, скорый в нуждах и скорбех сущим помощниче.
Радуйся, Церкве Православныя утверждение.
Радуйся, земли нашея озарение.
Радуйся, крымския паствы похвало.
Радуйся, града Симферополя украшение.
Радуйся, святителю Крымский, исповедниче Луко, врачу благий и милостивый.
Кондак 2
Видя в человецех во время врачеваний, аки в зерцале, премудрость и славу Творца всяческих Бога, к Нему духом выну возносился ecи, богомудре; светом же богоразумия твоего и нас озари, да вопием купно с тобою: Аллилуиа.
Икос 2
Разум твой Божественными ученьми просветил еси, Луко всеславне, отвергнув всякое плотское мудрование, с разумом же и волю повинул еси Господеви, подобен апостолом быв. Тии бо по слову Христову: «Грядита по Мне, и сотворю вы ловца человеком», — оставиша вся и по Нем идоша, и ты, святе, услышав Господа Иисуса, зовущаго тя на служение чрез раба Своего архиепископа Ташкентскаго Иннокентия, абие приемлеши священство в Церкви Православней. Сего ради, яко богомудраго наставника, тя ублажающе, воспеваем сице:
Радуйся, Ангела Хранителя увеселение.
Радуйся, яко николиже того опечалил еси.
Радуйся, во учении преспевавый и мудрецы мира сего удививый.
Радуйся, от творящих беззаконие уклонивыйся.
Радуйся, Божия Премудрости созерцателю и проповедниче.
Радуйся, истиннаго богословия златословесный учителю.
Радуйся, апостольских преданий блюстителю.
Радуйся, свеще, Богом возженная, мрак нечестия разгоняющая.
Радуйся, звездо, путь ко спасению показующая.
Радуйся, Православия ревнителю.
Радуйся, раскольников обличителю.
Радуйся, свидений и оправданий Господних возжадавый.
Радуйся, святителю Крымский, исповедниче Луко, врачу благий и милостивый.
Кондак 3
Силою благодати Божия, еще во временней жизни приял еси дар, святе Луко, недуги целити, да вси, усердно притекающии к тебе, исцеления недугов телесных и паче душевных сподобляются, вопиюще Богу: Аллилуиа.
Икос 3
Имея неусыпное попечение о спасении душ, вверенных тебе от Бога, Луко блаженне, пастырски к душеспасительной жизни и словом, и самым делом непрестанно наставлял еси. Сего ради приими от нашего усердия похвалы, достойно тебе приносимыя:
Радуйся, Божия разума исполненный.
Радуйся, благодатию Духа Святаго приосененный.
Радуйся, нищеты Христовы подражателю.
Радуйся, пастырю добрый, уклоняющихся от веры православныя и блуждающих по горам суемудрия взыскавый.
Радуйся, делателю винограда Христова, чад Божиих укрепляяй в истинней вере православней.
Радуйся, щите, защищаяй благочестие.
Радуйся, непоколебимое Православия основание.
Радуйся, твердый каменю веры.
Радуйся, душепагубнаго неверия и злотворнаго обновленчества обличителю и искоренителю.
Радуйся, в делании духовнем подвизающихся мудрый укрепителю.
Радуйся, от мира изгнанным пристанища тихаго указателю.
Радуйся, яко приим крест, Христу последовал еси.
Радуйся, святителю Крымский, исповедниче Луко, врачу благий и милостивый.
Кондак 4
Бурю внутрь имея помышлений многих, недоумеваше раб Божий, что речет о нем Господь, егда проразумеваху его достойна быти епископом граду Ташкенту, обаче всего себе Христу Богу предав, Тому о всем благодарение возсылаше, зовый: «Благословен Бог, изливаяй благодать Свою на архиереи Своя», — и поя Ему: Аллилуиа.
Икос 4
Слышавше людие православнии, в гонении сущии, о благоплодных добротах души твоея, богоносе Луко, и видевше тя на степени святительства, яко достойный сосуд Божественныя благодати, вся немощная врачующия и оскудевающая восполняющия, дивляхуся чудному промышлению Бога о тебе и приношаху ти благохваления сицевая:
Радуйся, архиерею, от Самаго Господа пронареченный.
Радуйся, о надписании сана епископскаго на книзе твоей предуказание мысленное приявый.
Радуйся, иерархов украшение.
Радуйся, пастырю, иже готов бысть душу положити за овцы своя словесныя.
Радуйся, многосветлый Церкве светильниче.
Радуйся, Апостолов сопричастниче.
Радуйся, исповедников украшение.
Радуйся, всякое о себе попечение отвергнувый.
Радуйся, скорбей утолителю.
Радуйся, о людских невежествиих печальниче.
Радуйся, искавших спасения правым учением оглашавый.
Радуйся, житием твоим сего учения не посрамивый.
Радуйся, святителю Крымский, исповедниче Луко, врачу благий и милостивый.
Кондак 5
Боготочною Кровию от вечныя смерти искупленныя соблюдая, егда сан епископа в дни страшных гонений по благословению святаго Патриарха Тихона от рук епископов православных приял еси, святителю Луко, дело благовестника добре сотворил еси, обличая, запрещая, умоляя со всяким долготерпением и учением и поя Богу: Аллилуиа.
Икос 5
Видевше Ангельстии чинове великия подвиги твоя, егда по заповеди Господней: «Блажени изгнани правды ради, яко тех есть Царствие Небесное», — в крепости сердечней безропотно понесл еси заточение и изгнание в Сибирь за имя Господа и Святую Церковь Христову, терпением велиим устрояя спасение свое, примером же своим верных души назидая, — удивишася. Мы же тя, усердно любовию почитающе, чествуем похвалами сими:
Радуйся, светильниче, на свещнице церковнем поставленный.
Радуйся, яко слово Писания: «Любы долготерпит», — на тебе оправдася.
Радуйся, защищати тя верным воспретивый.
Радуйся, властем повинувыйся и сего ради волею в руки воинов нощию предавыйся.
Радуйся, клевреты неправедных судей уничиженный.
Радуйся, в заточение со смирением безропотно шедый.
Радуйся, от паствы твоея Ташкентския правды ради изганный.
Радуйся, яко вернии о разлучении с тобою рыдаху.
Радуйся, за Господа распятаго изъязвленный и заушенный.
Радуйся, уста лживых неверов заградивый.
Радуйся, праведными усты твоими небесныя истины и во изгнании вещавый.
Радуйся, яко мученицы на небесех о терпении твоем ликовствоваху.
Радуйся, святителю Крымский, исповедниче Луко, врачу благий и милостивый.
Кондак 6
Проповедник немолчный тайны Пресвятыя, Единосущныя и Неразделимыя Троицы был ecи и в темнице, и во градех изгнания сибирскаго, терпя глад, мраз страны северныя и жестокость клевретов безбожных. Сего ради проповедует Церковь Крымская величия Божия, явленная на тебе, святителю Луко, яко целил еси силою Божиею недуги душевныя и телесныя и в стране изгнания, да вси единем сердцем и единеми усты воспеваем Богу: Аллилуиа.
Икос 6
Возсиял еси, яко звезда лучезарная, красноярстей пастве и тамбовстей, озаряя души верных и разгоняя тьму нечестия и безбожия. И исполнишася на тебе слова Христовы: «Блажени есте, егда поносят вам, и ижденут, и рекут всяк зол глагол на вы, лжуще, Мене ради». Ты бо, гонимый из града во град и клеветы терпевый, архипастырское служение усердне исполнял еси и сладостию писаний твоих вся алчущия и жаждущия правды насыщал еси, иже благодарне взывают тебе:
Радуйся, наставниче, всех к небеси путеводяй.
Радуйся, славы Божией истинный ревнителю.
Радуйся, воине Христов непобедимый.
Радуйся, за Христа Господа темницы и биения терпевый.
Радуйся, смирения Его истинный подражателю.
Радуйся, вместилище Духа Святаго.
Радуйся, вшедый с мудрыми в радость Господа твоего.
Радуйся, корыстолюбия обличителю.
Радуйся, пагубу тщеславия показавый.
Радуйся, беззаконники ко обращению призывавый.
Радуйся, имже Христос прославися.
Радуйся, имже сатана посрамися.
Радуйся, святителю Крымский, исповедниче Луко, врачу благий и милостивый.
Кондак 7
Хотя достойно совершити подвиг, от Бога на тя возложенный, облеклся еси во вся оружия Божия и стал еси на брань противу миродержителей века сего, духов злобы поднебесных, препоясав чресла своя истиною и облекся в броню правды, угасил еси, исповедниче Луко, вся стрелы лукаваго, поя Содетелю и Богу: Аллилуиа.
Икос 7
Новое гонение воздвигоша беззаконнии и безбожнии человецы на Церковь Православную и во глубину дальней таежной страны услаша тя, святителю Луко, и близ смерти быв, рукою Божиею сохранен, взывал еси со Апостолом Павлом: «До нынешняго часа и алчем, и жаждем, и наготуем, и страждем, и скитаемся. Гоними, терпим; якоже отребие миру быхом, всем попрание доселе». Сего ради, ведуще о тебе таковая, ублажаем тя:
Радуйся, исповедниче Христов блаженный.
Радуйся, мраз лютый и глад во изгнании претерпевый.
Радуйся, близ смерти бывый, Господом сохраненный.
Радуйся, самоотвержение всецелое показавый.
Радуйся, уневестивый душу твою Жениху Христу.
Радуйся, Господа, распятаго на Кресте, присно пред собою предзревый.
Радуйся, яко во бдениих и молитвах неослабно пребывал еси.
Радуйся, Единосущныя Троицы истинный ревнителю.
Радуйся, от всякия болезни скорый и безмездный врачу.
Радуйся, ломотныя и опухлыя уврачевавый.
Радуйся, от неисцельныя гнойныя болезни костей и ран здравых возставивый.
Радуйся, яко верою твоею и труды врачебными расслабленнии исцелеша.
Радуйся, святителю Крымский, исповедниче Луко, врачу благий и милостивый.
Кондак 8
Странник во юдоли земней быв, терпения, воздержания и чистоты образ показал еси, исповедниче Луко. Егда отечество в опасности от нашествия иноплеменник пребываше, любовь евангельскую являя, деннонощно во врачевнице труждался еси, исцеляя недуги и раны вождей и воинов отечества земнаго, непамятозлобием и любовию удивляя всех творящих ти напасти, и многия сим обратил еси ко Христу, во еже пети Ему: Аллилуиа.
Икос 8
Весь исполнь любве Христовы, Луко благосерде, душу твою полагал еси за други твоя, и яко Ангел Хранитель был еси ближним и дальним, озлобленныя укрощая, враждующия примиряя и спасение всем устрояя. Поминающе труды твоя во благо людей отечествия твоего, благодарне взываем ти:
Радуйся, дивную любовь ко отечеству земному показавый.
Радуйся, смирения и незлобия учителю.
Радуйся, изгнание и жестокия муки мужемудренно претерпевый.
Радуйся, за Христа страдавый и мучим бывавый.
Радуйся, твердо Его исповедавый.
Радуйся, злобу врагов любовию Христовою победивый.
Радуйся, отче благосердый, спасения многих взыскавый.
Радуйся, великими скорбьми искушенный.
Радуйся, в гонениих терпение дивное явивый.
Радуйся, яко за враги Господа умолял еси.
Радуйся, егоже любовь всяку вражду победи.
Радуйся, егоже незлобие сердца жестокия покори.
Радуйся, святителю Крымский, исповедниче Луко, врачу благий и милостивый.
Кондак 9
Всем был еси вся, якоже и святый Павел, да всяко некия спасеши, святителю Луко, архипастырский подвиг совершая, в Тамбовстем крае многими труды храмы обновляя и созидая, уставы святоотеческия строго соблюдая, спасению паствы твоея служити не престал еси, чисто Богови поя: Аллилуиа.
Икос 9
Витии человеческия не возмогут по достоянию изрещи твоих благодеяний множество, егда явися на Крымстей земли, яко отец чадолюбивый, святителю отче Луко, щедродательная бо десница твоя всюду досязаше. Мы же, благосердию твоему подражати хотяще, во удивлении взываем к тебе:
Радуйся, лучу любве Божия.
Радуйся, сокровище милосердия Спасова неистощимое.
Радуйся, яко вся своя неимущим раздавал еси.
Радуйся, ближния твоя паче себе возлюбивый.
Радуйся, безматерних сирот питателю и окормителю.
Радуйся, безпомощных старцев и стариц попечителю.
Радуйся, яко болящия и в темнице заключенныя посещал еси.
Радуйся, яко нужды бедных во мнозех местех отечества свого предварял еси.
Радуйся, яко нищия поминая, трапезы им устроял еси.
Радуйся, яко коемуждо в горестех, аки Ангел утешитель являлся еси.
Радуйся, Ангеле земный и человече небесный.
Радуйся, яко о глубине милосердия твоего Мати Божия возрадовася.
Радуйся, святителю Крымский, исповедниче Луко, врачу благий и милостивый.
Кондак 10
Спасению крымския паствы твоея служити многолетне не преставая, по образу Пастыреначальника Христа, на рамех заблуждших взем, Богу и Отцу привел еси, надеждею бо на Божие милосердие утешая, ко исправлению жития словесы учительными твоими влекл еси вся, во еже сердцем чистым пети Богу: Аллилуиа.
Икос 10
Царя Небеснаго Христа Бога верный служитель быв, святителю отче Луко, неустанно возвещал еси слово истины во всех храмех земли Таврическия, душеспасительною пищею учения евангельскаго верныя чада питая и устав церковный строго исполняти повелевая. Темже тя, яко пастыря добраго, прославляем сице:
Радуйся, неутомимый проповедниче евангельския правды.
Радуйся, яко Богом врученное тебе стадо словесное добре пасл еси.
Радуйся, овцы своя от душепагубных волков охранявый.
Радуйся, чина церковнаго строгий блюстителю.
Радуйся, чистоты веры православныя охранителю.
Радуйся, тобою бо Дух Святый написа словеса спасительная.
Радуйся, мудрецем века сего бытие Божие проповедавый.
Радуйся, яко слово твое, аки в ризы позлащенны, в тайны веры одеяся.
Радуйся, молние, гордыню низлагающая.
Радуйся, громе, беззаконно живущия устрашаяй.
Радуйся, церковнаго благочестия насадителю.
Радуйся, архипастырю, пастыри духовныя наставляяй и вразумляяй непрестанно.
Радуйся, святителю Крымский, исповедниче Луко, врачу благий и милостивый.
Кондак 11
Пение у гроба твоего, угодниче Божий, не умолкаше во днех блаженнаго успения твого. Мнози бо, ведуще тя богоносна и равноангельна, собрашася от всех предел земнаго отечествия твоего совершити моление соборное о души твоей, в горния обители Отечествия Небесного восходящей, воспевающе Богу: Аллилуиа.
Икос 11
Свещею, в Церкви Христовой горящей светом невещественным благодати Божией, был еси, святителю Луко, вся концы земли нашея озаряя. Егда же приспе время отшествия твоего, божественнии Ангели прияша святую душу твою и в небесныя обители вознесоша. Темже, поминающе блаженное успение и велие твое на небеси и на земли прославление, с радостию приносим ти благохваления сия:
Радуйся, светильниче немеркнущий Света Невечерняго.
Радуйся, яко мнози прославиша чрез твоя добрая дела Отца Небеснаго.
Радуйся, угодниче Божий, течение благочестне скончавый.
Радуйся, веру, надежду и любовь от Господа стяжавый.
Радуйся, со Христом, Егоже возлюбил еси, на веки соединивыйся.
Радуйся, Царствия Небеснаго и славы вечныя наследниче.
Радуйся, яко свет добрых дел твоих пред человеки просветися.
Радуйся, научивый заповедем Христовым и сотворивый я.
Радуйся, архиерею, от Вечнаго Архиерея Христа благодатными дары исполненный.
Радуйся, скорый помощниче призывающим тя.
Радуйся, земли Крымския новое светило и утверждение.
Радуйся, рода христианскаго благодатный покровителю.
Радуйся, святителю Крымский, исповедниче Луко, врачу благий и милостивый.
Кондак 12
Благодать, свыше ти данную, познавше, благоговейно лобызаем честнаго лика твоего изображение, святителю Луко, чающе тобою получити просимое от Бога. Темже, припадающе ко святым мощем твоим, со умилением молим тя: укрепи нас добре стояти в вере православней и, угождающе благими делы, немолчно пети Богу: Аллилуиа.
Икос 12
Поюще Бога, дивнаго во святых Своих, хвалим тя, Христова исповедника, святителя и предстателя пред Господем. Весь бо еси в вышних, но и нижних не оставляеши, святителю отче Луко, присно со Христом царствуеши и о нас, грешных, пред Престолом Божиим ходатайствуеши. Сего ради во умилении зовем ти:
Радуйся, света неприступнаго зрителю.
Радуйся, емуже сорадуются Ангелы и о немже веселятся человецы.
Радуйся, делы и писаньми твоими неверующия просвещаяй.
Радуйся, маловерныя и малодушныя укрепляяй и утверждаяй.
Радуйся, яко достоин явился еси Царствия Небеснаго.
Радуйся, путем исповедничества райских селений достигнувый.
Радуйся, поношения Христа ради терпевый и вечную с Ним славу приявый.
Радуйся, души наша к Царствию Небесному путеводяй.
Радуйся, предстателю пред Престолом Божиим за нас, грешных.
Радуйся, Православия похвало и земли нашея радование.
Радуйся, в сонме святых быти сподобивыйся.
Радуйся, собору всех Крымских святых сопричастниче.
Радуйся, святителю Крымский, исповедниче Луко, врачу благий и милостивый.
Кондак 13
О великий и преславный угодниче Божий, святителю отче наш Луко, приими сие похвальное пение от нас, недостойных, с любовию сыновнею тебе приносимое. Предстательством твоим у Престола Божия и молитвами твоими всех нас в вере православней и добрых делех утверди, от всяких бед, скорбей, болезней и напастей, в сей жизни находящих, сохрани, от мучений в будущем веце избави и сподоби в вечней жизни купно с тобою и со всеми святыми пети Творцу нашему: Аллилуиа.
Этот кондак читается трижды, затем икос 1 и кондак 1
Молитва
О всеблаженный исповедниче, святителю отче наш Луко, великий угодниче Христов! Со умилением приклоньше колена сердец наших, и припадая к раце честных и многоцелебных мощей твоих, якоже чадо отца молим тя всеусердно: услыши нас грешных и принеси молитву нашу к Милостивому и Человеколюбцу Богу, Ему же ты ныне в радости святых и с лики ангел предстоиши. Веруем бо, яко ты любиши ны тою же любовию ею же вся ближния возлюбил еси, пребывая на земли.
Испроси у Христа Бога нашего да утвердит во святей своей Православней Церкви дух правыя веры и благочестия: пастырям ея да даст святую ревность и попечение о спасении вверенных им людей: право верующия соблюдати, слабыя и немощныя в вере укрепляти, неведущия наставляти, противная обличати. Всем нам подай дар коемуждо благопотребен, и вся яже к жизни временней и к вечному спасению полезная. Градов наших утверждение, земли плодоносие, от глада и пагубы избавление. Скopбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление.
Подаждь нам всем твое архипастырское и святое благословение, да тобою осеняеми избавимся от козней лукаваго и избегнем всякия вражды и нестроений, ересей и расколов.
Даруй нам богоугодно прейти поприще временной жизни, настави нас на путь ведущий в селения праведных, избави нас воздушных мытарств и моли о нас Всесильнаго Бога, да в вечней жизни с тобою непрестанно славим Отца и Сына и Святаго Духа, Ему же подобает всякая слава, честь и держава во веки веков. Аминь.
Тропарь, глас 1
Возвестителю пути спасительнаго, исповедниче и Архипастырю Крымския земли, истинный хранителю отеческих преданий, врачу богомудрый святителю Луко, Христа Спаса непрестанно моли веру непоколебиму православным даровати, и спасение, и велию милость.
Кондак, глас 1
Якоже звезда всесветлая, добродетельми сияющи, был еси святителю, душу же равноангельну сотворил еси, сего ради святительства саном почется, во изгнании же от безбожных много пострадал еси и непоколебим верою пребыв, врачебною мудростию многия исцелил еси. Темже ныне честное тело твое, от земленых недр обретенное дивно, Господь прослави, да вси вернии вопием ти: радуйся, отче святителю Луко, земли Крымския похвало и утверждение.
Величание
Величаем тя, / исповедниче Христов, святителю отче наш Луко, / и чтим святую память твою, / ты бо молиши о нас // Христа Бога нашего.